lhasang

The tradition & historical record

ལྷ་བསང་ཞེས་པ་ཡུལ་ལྷ་གཞི་བདག་ལ་བསང་མཆོད་འབུལ་བའི་ཆོ་ག་ཞིག་སྟེ། སྲོལ་འདི་བོད་དུ་དར་ནས་ལོ་རྒྱུས་རིང་པོ་ཡོད་ཚོད་རེད་དེ། གཙོ་བོར་ས་ཕྱོགས་སོ་སོར་གྲུབ་ཐོབ་གོང་མས་དམ་ལ་བཞག་ཅིང་། དཀར་ཕྱོགས་སྐྱོང་བའི་ལྷ་བཞུགས་པ་དེ་རྣམས་དགྱེས་པའི་ཕྱིར་ཤུག་པ་དང་བ་ལུ་སོགས་ལ་དཀར་གསུམ་མངར་གསུམ་བསྲེས་པའི་ཕྱེ་མར་འདེབས་པ་མེར་བསྲེག སྐྱབས་སེམས་ནས་བཟུང་སྟེ་ཡི་དམ་གང་རུང་གི་ང་རྒྱལ་བཟུང་ནས་བསང་ཡིག་ལྟར་མཆོད་པ་བྱེད་ཅིང་ཕྲིན་ལས་ཕྲན་ཚེགས་རྣམས་བཅོལ་བའོ། ། དེ་ལ་ཤེས་དགོས་པ་ནི་བསང་མཆོད་འབུལ་ཡུལ་དུ་གྱུར་པའི་ཡུལ་ལྷ་སོགས་འཇིག་རྟེན་པའི་ལྷ་རྣམས་གནས་སྐབས་ཀྱི་ཁ་འཛིན་སྡོང་གྲོགས་སུ་བསྟེན་པ་ལས་ཚེ་འདི་ཕྱིའི་སྐྱབས་གནས་སུ་བརྩིས་ནས་ལྷ་བསང་གཏོང་བ་མ་རེད། གོ་ཐོས་སུ་བོད་ཀྱི་ཡུལ་ཕྱོགས་འགར་ནག་ཕྱོགས་ཀྱི་ཡུལ་ལྷ་མཆོད་མཁན་ད་དུང་ཡང་ཡོད་པར་བཤད་པས་དེ་ནི་རྣམ་པ་ཀུན་ཏུ་མི་རུང་ངོ་། ། ¹

སྤྱིར་བསང་ཟེར་བ་ནི་ངོ་བོའམ་གོ་དོན་གྱི་ཆ་ནས་བཤད་ན། ཞུ་ཆེན་ཚུལ་ཁྲིམས་རིན་ཆེན་གྱིས། དག་བྱེད་དྲི་ཞིམ་གྱི་ཆོ་ག་གང་ཞིག ཉེས་སྐྱོན་གྱི་སྒྲུབ་བྱེད་ཐམས་ཅད་བྱང་ཞིང་། བདེ་ལེགས་སྟེར་བའི་ནུས་པ་དང་ལྡན་པ། ཞེས་གསུངས་པ་ལྟར། དག་བྱེད་དྲི་ཞིམ་རྫས་ཀྱི་ནུས་པས་ཉེས་སྐྱོན་འབག་གཙོག་བྱང་བར་བྱེད་ཅིང་། བདེ་ལེགས་སྟེར་བའི་ཆོ་ག་ཞིག་ལ་བསང་ཟེར། ཤེས་པར་རློམ་པ་འགའ་ཞིག་གི་རྣམ་རྟོག་ལ་བསང་གཏོང་བའི་སྐབས་སུའང་སྐྱབས་གསུམ་གཙོ་བོ་དང་འཇིག་རྟེན་པའི་ལྷ་ཀླུ་ཞར་བྱུང་དུ་སྨྲ་བ་ནི། མཆོད་རྟེན་ནག་འཇམ་མེར་བཞག་ནས་བྲག་ལ་དཀར་རྩི་བྱུག་པའི་དཔེ་ལྟར་དེ་ཙམ་འགྲིག་པར་མི་སྣང་སྟེ། རྒྱལ་མཆོག་ལྔ་བ་ཆེན་པོས། དེང་དུས་ལྷ་ཀླུ་ཞར་བྱུང་ཙམ་བྱས་ནས། ། བླ་མ་ཡི་དམ་གཙོར་བྱས་བསང་ཡིག་རྣམས། ། དགོས་དོན་མ་རྟོགས་གྱ་ཚོམ་སྨྲ་བའི་ཚིག ། མཆོད་རྟེན་ནག་འཇམ་བྲག་ལ་དཀར་རྩི་བཞིན། ། ཞེས་གསུངས་པ་ལྟར་རོ། ། དེ་ལ་འདིར་ལྷ་བསང་གི་ཁུངས་དང་། ལྷ་བསང་གཏོང་ཡུལ། ལྷ་བསང་གི་རྫས། རྫས་མ་དག་པའི་ཉེས་སྐྱོན། ལྷ་བསང་གཏོང་བའི་གནས་དང་དུས། ལྷ་བསང་གི་ཕན་ཡོན་བཅས་ས་བཅད་དྲུག་གིས་བཤད་པར་འདོད་དོ། ། ¹

རྒྱལ་དབང་ལྔ་བ་ཆེན་མོས་བསང་གི་སྲོལ་ཐོག་མར་གཡུང་དྲུང་བོན་གྱིས་བཏོད་པར་བཞེད་དེ། གངས་རིའི་དཔལ་ལྡན་སཱ་ལའི་ལྗོངས་ཆེན་པོའི། ། ལྷ་ཀླུ་གཞི་བདག་དགའ་བར་བྱེད་པའི་བསང་། ། ཞང་ཞུང་གཤེན་རབ་མེས་པོའི་རྗེས་འབྲང་བའི། ། གཡུང་དྲུང་བོན་གྱིས་སྲོལ་བཏོད་ཐོག་མར་དར། ། ཞེས་གསུངས་སོ། ། དེ་ལས་གཞན་མདོ་རྒྱུད་རྣམས་སུའང་བསང་གི་ཁུངས་མེད་པ་མ་ཡིན་ཏེ། མ་གྷ་དྷ་བཟང་མོས་བཅོམ་ལྡན་འཁོར་བཅས་སྤྱན་འདྲེན་སླད་དུ་སྤོས་དང་མེ་ཏོག་ཁྱེར་ནས་ཁང་བཟང་གི་རྩེར་འཛེག་སྟེ་གསོལ་བ་བཏབ་པ་དེ་དང་། གསེར་འོད་དམ་པའི་མདོ་ལས་ཀྱང་། བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེ་དབང་བོའི་རྒྱལ་བོ་དེ་ལ་མཆོད་པའི་སླད་དུ་བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ། དེ་དག་སྐད་ཅིག་ཐང་ཅིག་ཡིད་ཙམ་དེ་ལ་རྒྱལ་བོ་ཆེན་པོ་བདག་ཅག་བཞིའི་རང་རང་གི་ཁང་བའི་སྟེང་གི་བར་སྣང་ལ་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་རྣམས་སུ་གནས་པར་འགྱུར། ཞེས་དང་། ཐུའུ་བཀྭན་ཆོས་ཀྱི་ཉི་མས། གསང་འདུས་རྩ་རྒྱུད་སོགས་སུ། དྲི་ལ་རྣམ་གསུམ་ཤེས་བྱས་ནས། ། ཞེས་པའང་བསང་གི་ཁུངས་སུ་བཀོད་དོ། ། བཤད་ཚུལ་ཕྱི་མས་སྔ་མ་རྫུན་པར་འགྱུར་བའང་མ་ཡིན་ཏེ། ལྔ་བ་ཆེན་པོས་གསུངས་པ་ནི་བོད་དུ་བསང་བྱུང་བ་ཐོག་མར་བོན་ནས་དར་བ་དང་། གཞན་དག་གིས་ནང་བའི་གཞུང་ནའང་བསང་གི་ཁུངས་ཡོད་པར་བཤད་པ་ཡིན་པས་མི་འགལ་བའམ། ཡང་ན། རྒྱལ་དབང་ལྔ་བས་བོད་དུ་བསང་གི་ཐོག་མའི་བྱུང་རིམ་དང་། གཞན་དག་གིས་བོད་དུ་བསང་གསོལ་ཐོག་མར་བྱུང་ཚུལ་བཤད་པ་མ་ཡིན་པར་ནང་བའི་གཞུང་ན་བསང་གི་ཁུངས་ཡོད་པར་སྨྲས་པ་ཡིན་པས་མི་འགལ་ལོ། །