Tari Indang

The tradition & historical record

Tari Indang utawi Tari Dindin Badindin inggih punika silih tunggil sasolahan sane kaloktah ring Propinsi Sumatera Barat pamekasnyane ring wawidangan Pariaman, suku Minangkabau. Kruna indang ring wastan sasolahan puniki wit saking basa Minang sane maartos rebana alit. Wastan tiosan saking Tari Indang inggih punika Tari Dindin Badindin. Sasolahan puniki pinaka asil akulturasi budaya agama Islam miwah budaya lokal Minang. Kawentenan kesenian puniki kabakta olih para ulama Islam saking wawidangan Aceh ka tanah Padang Pariaman. Pangawitnyane, Tarian Indang puniki pinaka sarana nglimbakang ajahan Agama Islam ring krama Minang. Sasolahan puniki taler madue kawigunan pinaka kebutuhan rohani. ¹

Tari Indang ping ajeng kauningayang olih Syekh Burhanuddin duk abad ka-13 utawi abad ka-14. Indike puniki sajeroning nyobiahang ajahan agama Islam ring Sumatera Barat. Ring pustaka tiosan, sasolahan sane kabaos pinaka Tari Dindin Bandinding puniki sujatinnyane wit saking para pedagang Arab sane sedek malabuh ring Minangkabau. Tiosan madolan, taler matatujon nyobiahang agama Islam ring wawidangan Sumatera Barat malarapan jalur perdagangan. Ring jalur puniki kamargiang interaksi pedagang Arab miwah krama pasisi tanah Minang. Wusan punika, kabaos silih tunggil agamawan pangiring Syekh Burhanuddin sane mapesengan Rapa'I, ngawi nguningayang Tarian Indang sajeroning pestipal perayaan Tabuik ring pariaman. Pestipal puniki pinaka perayaan lokal krama sane nyeneng ring wawidangan pasisi pasih Sumatera Barat. Pestipal puniki taler matatujon mikelingin lebarnyane Imam Husein bin Ali, cucu saking Nabi Muhammad SAW. Saking punika, Tarian Indang setata kasolahang sajeroning perayaan Tabuik kantos mangkin. Pangawitnyane, Rapa'I nganggen perkusi minakadi rebana pinaka alat musik pangiringnyane. Daweg punika, sasolahan puniki kaanggep pinaka sasolahan sane sakral duaning madaging sipatuang sirah utawi kelompok anak lingsir sane madue kekuatan gaib sajeroning kelompok sasolahannyane. ¹

Sasolahan puniki madue kawigunan pinaka media dakwah para ulama sajeroning nyobiahang agama Islam. Tiosan punika, sasolahan puniki taler madue uger-uger ring pementasannyane. Wenten kalih soroh uger-uger pementasan tari, inggih punika uger-uger Indang munggah miwah tedun. Tarian Indang munggah puniki jagi kasolahang ring pangawit utawi rahina kapertama ring jam 11-12 wengi. Indang tedun kasolahang ritatkala sanja utawi nyaluk wengi sawusan solat Magrib. Sakewanten mangkin, uger-uger inucap sampun nenten kanggen malih. Sasolahan tradisional puniki nyihnayang indik krama Padang Pariaman sane pinih sadarana. Saling menghormati miwah patuh ring titah Tuhan Yang Maha Esa. Yening ring panagwitnyane, sasolahan puniki wantah pinaka media dakwah, nganutin aab jagate, kawigunan asolahan puniki manados sasolahan panglila cita. ¹

Gerakan kapertama Tarian Indang kawastanin pinaka erakan persembahan. Puniki duaning ring gerakan sane kasolahang madue makna pinaka pakeling miwah penghormatan majeng anak sane madue jasa sajeroning nyobiahang agama Islam. Tiosan punika, gerakan puniki taler madue kawigunan miwah makna pinaka nunas pangampura majeng pemuka adat miwah mamak lan ninik sane sampun rauh ring pementasan inucap. Nenten lali, nunas ampura miwah penghormatan taler katujuang kelompok tari tiosan sane sampun miwah jagi masolah. ¹

Ring gerakan inti puniki wenten makudang-kudang gerakan minakadi antak siku, bago baranang, miwah alang tabang. Makna gerakan puniki pinaka cerita sane nyritayang utsaha sane kamargiang mangda ngamolihang tatujonnyane. Punika taler mapaiketan sareng perjuangan ulama miwah pendakwah sajeroning nyobiahang ajahan agama Islam ring masa sane sampun lintang. Gerak alang tabang nyritayang indik rasa bagia miwah seneng krama sawawidangan. ¹

Gerakan penutup inggih punika ragam gera panguntat sane kasolahang olih pragina sadurung muputin sasolahan. Gerakan puniki nyihnayang indik nunas pangampura majeng krama tanah Minang. Tiosan punika, gerakan puniki taler pinaka simbol nunas ampura majeng para pamiarsa sane sampun miarsayang sasolahan. ¹

The text above is adapted from the Wikipedia article “Tari Indang”, available under the Creative Commons Attribution-ShareAlike 4.0 licence. ¹

Tari Indang is recorded in open cultural data. The structured record cited below does not describe the practice, and this entry has not yet been reviewed by a person familiar with the tradition. ²